挪威有諾貝爾和平獎，大陸就有人搞咗個A貨，名叫孔子和平獎，香港演藝界有樣學樣，打算搞個A貨「艾美獎」。香港電視專業人員協會會長徐小明噚日公佈，出年3月22日喺灣仔會展，舉辦首屆亞洲「彩虹獎」電視頒獎禮，表揚亞洲區內傑出嘅電視人才。橋唔怕舊，最緊要受，但今次呢條橋就要政府攞納稅人錢嚟受，負責埋半張單。
港府撥款千萬
呢個彩虹獎抄足美國電視界每年一度盛事艾美獎（EmmyAwards），獎項分為戲劇、紀錄片、音樂節目、動畫四大類，之下再細分獎項，當中梗係唔少得最佳男、女主角、最佳導演、最佳編劇等。徐小明話，彩虹象徵和平橋樑，可以跨越國界，希望呢個獎項能夠加強亞洲區嘅電視人才交流。
搞個咁大堆頭頒獎禮，開支要1,300萬元。錢從何來？當然又係攤大手板問政府，由成立一年半嘅創意香港辦公室撥款。不過，徐小明話條數已經俾政府左縮右削，最終只係批咗500幾萬元，餘額要自己搵商業贊助。佢又話獎項一定唔係小圈子豬肉獎，會由各地區派出權威人士擔任評判喎。
除咗贊助A貨艾美獎，創意香港亦撥款500幾萬畀國際唱片業協會香港分會，出年3月23日舉辦首屆亞洲流行音樂節。協會主席吳雨話中、港、台三地連同日本、南韓、馬來西亞、新加坡總共七個國家地區，到時會派出頂尖新星歌手嚟香港參賽，再選出一位星中之星嘅超級超新星。另外仲設最佳舞台表演同最佳歌曲演繹獎。
辦亞洲音樂節
咁香港派邊位歌星出戰？吳雨話家唔講得，總之香港嘅代表已經由無綫、商台等電子傳媒一早選咗，但要等到出年亞洲流行音樂節先公佈。
兩個大騷搞手都話好有計劃、好落力咁搞，但有A貨諾貝爾和平獎在前，八方都有啲擔心一樣被河蟹，煲呔同MCJin網上rap歌雖然俾人惡搞，但仍然以「人氣組合」代表香港出賽，至於視帝個獎，溫總自然係大熱，由佢代表內地參賽十拿九穩。
mailto:[email protected]