曼城前鋒巴洛迪利前日話全世界只有一個球員勁佢少少，嗰個係美斯，而佢夠實力幫曼城成為英超同歐霸雙料冠軍。你話佢天真又得，自大又得，但佢就肯定唔識咩叫人情世故，夠膽死公開話唔知阿仙奴新星韋舒亞係乜水，好hurt人啫。井底之蛙，其實係佢。
攞硬英超歐霸盃
「我目標係終有一日成為世界最佳球員。除咗美斯勁我少少之外，其他人都比唔上我。」呢位20歲意大利黑人國腳前鋒越講越起勁：「我亦想贏英超同埋歐霸盃，贏英超只係延續我之前幫國際米蘭聯賽3連霸，至於歐霸，係我未贏過嘅錦標，我好睇好自己隊波會贏到。」
巴洛迪利意氣風發，全因日前獲意大利《都靈體育報》頒發歐洲金童獎，力壓阿仙奴中場韋舒亞。佢由兩年前喺呢個選舉得第6，一年前得第4，到今年得獎，確實係越嚟越進步。話晒佢係去季國際米蘭贏3冠王嘅成員（雖然好多時係擔任後備），得呢個獎爭議唔大，但佢公告自己只係一人之下之前，話唔識韋舒亞，就難免惹起爭議。
唔識邊個韋舒亞
「我從來冇聽過呢個名，唔知佢係邊個，不過下次對阿仙奴賽前，我會留意吓佢。」大家一定覺得韋舒亞受委屈，堂堂英格蘭國腳，人氣越嚟越盛，竟然有人唔識佢？諗深一層，佢根本唔使臉紅，要臉紅嘅係巴洛迪利至啱，參戰英超幾個月，連當紮小將都唔識，學咩人嚟搵食，睇嚟好錫佢嘅文仙尼，要教巴洛迪利嘅嘢又點止踢波咁簡單？
計我話，巴洛迪利不如都係返意甲發展好過，反正佢日前又重申想披上AC米蘭戰衣：「伊巴謙莫域成日call我叫我加盟AC米蘭，或者終有一日我能夠如願。」