今時今日，要同親朋戚友講聲聖誕快樂。最方便梗係發個手機短訊或者e-mail啦，唔使再寄聖誕卡。不過聖誕老人始終係個icon人物，唔少細路同大人，仲會寄信畀佢，希望願望成真。
香港郵政每年收到約4,000封「聖誕老人收」嘅郵件，20幾年嚟都有職員充當聖誕老人回信。有小朋友同聖誕老人講心事，話最後一次喺醫院見爸爸，今年聖誕願望，係想同爸爸過一日。聖誕老人無法改變事實，退而其次鼓勵佢要好好孝順媽媽。
咪以為聖誕老人一定係男人，喺香港郵政做揀信助理員李麗歡，兩年來幫咗聖誕老人唔少忙，逐一回信畀小朋友同大細路。佢話自己細個都相信世界上有聖誕老人。有粉絲擔心天寒地凍，問聖誕老人隻鹿仔有冇生病；有人想知道聖誕老婆婆靚唔靚。總之只要貼足郵票，寫明回郵地址，聖誕老人一定唔會令「粉絲」失望。