英國大雪，倫敦機場陷於癱瘓，飛機停飛，BBC話可能要停到十二月二十六日，甚麼包機都冇用，於是大批香港學生、遊客滯留機場，行不得也哥哥。滯留機場，係好辛苦，好冇趣味嘅一回事，但未至於危及性命，除咗嘆句冇運之外，鬧人鬧政府都冇用，當然最應受駡嘅就係倫敦機場，點解應付不了大雪？但好難講嘅，過往幾十年，英國冬天比較溫和，絕少出現今天嘅狀況，加上，你知啦，英國冇乜銀，平時邊會不斷注資，改善機場設施嚟應付百年一遇嘅大雪吖。
但一啲香港人突然鬧埋特區政府，就幾冇理由，而政府一聽見駡，就嗱嗱聲話考慮包機往倫敦接滯留學生返嚟，你話呢個政府幾可愛吖！左丁山有理由相信，大部份回港渡假嘅留英學生，會係富家子弟，否則點會話返就返，唔留在原地搵兼職幫補生活費或不回港以節省經費吖。唔信？問吓留英學生陶傑就知啦。香港駐英代表派人到機場作必要「賑濟」，發放零用錢，以後問家長攞番，解燃眉之急，係應該嘅，但派專機去接學生回港渡聖誕？有錢仔女唔駛捱苦嘅咩。即使佢哋回港不及，錯過聖誕假期，咁又點？咪當上人生一課囉，香港人對下一代如此呵護，以後唔好怪下一代香港人唔捱得。
冰封倫敦，左丁山與一眾球迷都覺得好冇癮啫！因為星期日嘅車曼大戰取消咗吖嘛。車仔與曼聯對碰，係一季英超重頭戲，今戰取消延期，對兩隊以及所有參加歐冠盃、歐霸盃球賽嘅英超隊，都會有好大影響，因為歐洲隊伍已進入冬眠，養精蓄銳準備明年賽事，偏偏每年呢個時候，英超進入高峰期，例如星期日就取消咗九場，二十六日有十場比賽，二十八日十場，一月一日十場，一月四日五場，一月五日五場，若果呢啲賽事全受風雪影響而改期嘅話，英超秩序大亂，明年搵時間加賽已經頭痛，曼聯、阿仙奴、車仔、熱刺、曼城、利物浦等自二月十六日起又要應付歐洲賽，球員疲於奔命，踢到殘啦，佢哋對住中游隊伍會隨時失分，故此下半季賭英超波嘅話絕不能大注，英超球隊在歐洲爭標嘅機會亦要睇低啲。