嚟緊聖誕同新年普天同慶嘅日子，各大商場除咗佈置得靚靚吸引多啲人流，原來仲好窩心咁幫大家諗埋，點樣可以唔使冒醉駕嘅風險兼且可以盡慶而歸！好似信置（083）咁，佢哋旗下5大商場，包括奧海城一期及二期、中港城、香港黃金海岸商場同屯門市廣場一期，只要喺平安夜同除夕當日消費夠100蚊，就可以用28蚊嘅優惠價，由當晚10點泊車泊到第二朝10點，泊足12粒鐘，平均每粒鐘只係兩個三毫幾咋！
新地（016）都唔弱，旗下apm、大埔超級城、上水新都廣場、元朗廣場同薄扶林南區廣場都有泊車優惠，不過，只限除夕夜10點至元旦朝早10點；同樣12粒鐘，每粒鐘只係收1蚊，仲抵過信置！平成咁，唔知到時會唔會出現車龍呢？