早前在杜拜忙於拍攝《職業特工隊》第4集的美國動作巨星湯告魯斯（TomCruise），難得放下繁忙的拍攝工作，回到紐約與女兒Suri迎聖誕兼為太太姬蒂荷姆絲（KatieHolmes）慶祝32歲生日，可惜姬蒂卻全程口黑面黑擺款，令身旁的靚佬湯大感無癮，兩人翌日步出寓所時亦明顯爭拗未完，靚佬湯更拉着姬蒂的手臂講數。
湯告魯斯日前為拍攝《職業特工隊》第4集《Mission：ImpossibleGhostProtocol》曾征服高124層樓的全球最高大廈哈利法塔（BurjKhalifa），但卻未能征服家中嬌妻，極都唔掂。
扮恩愛都嫌煩
雖然姬蒂荷姆絲於上周六才度過32歲生日，並獲老公陪伴，兩人手拖手做gym兼撇低愛女Suri晚飯撐枱腳，面露愉快神色，但後來連續幾天兩人都嗌交以致面左左收場，破壞了慶祝的雅致。
結婚近6年的靚佬湯，大前晚與姬蒂及手抱Suri到紐約的意大利餐廳晚飯，吃完晚餐後兩人轉到附近的酒店打算嘆著名甜品，但姬蒂步出餐廳時口黑面黑毫無心機，連在狗仔隊面前做戲扮恩愛都嫌麻煩，似比女兒Suri更需要人抱抱呵護，與靚佬湯笑容滿面面對鏡頭的神情大相逕庭。
捉實手臂談判
其實靚佬湯放下工作回到紐約數天，都在當廿四孝老公老竇，除連續幾晚陪姬蒂賀壽外，更曾帶Suri看《胡桃夾子》的芭蕾舞劇，一家人開開心心，然而未知姬蒂因何仍然不滿。
直至前晚靚佬湯再與姬蒂從紐約寓所步出，明明是夜晚卻齊齊戴上黑超，明顯想掩飾滿目凶光，姬蒂心情尚未平復，抱着Suri的她想一個箭步離開，但卻給同樣一臉不悅的靚佬湯從後捉着手臂，兩人停下來講數，面上均有難色，看來仍有排煩。