匯賢智庫主席葉劉淑儀同時身任新民黨主席，外界估計佢咁活躍，有可能係為2012年參選特首鋪路，噚日佢喺港台節目《中國點點點》中都被問到係咪會去馬選特首，佢冇直接回應，只係話參選特首嘅問題太敏感喇，話總之會繼續服務香港市民，任何崗位都唔重要。答完反而令呢個謎團更難拆解。
爆搞笑往事
葉太喺節目內憶述一件搞笑往事，話說80年代中期，佢負責招呼訪港嘅內地官員去富麗華酒店食飯，點知位位幹部都着住軍裝赴會，當年極少會喺鬧市見到一班解放軍出現，嚇到在場人士眼凸凸，以為北京提前收番香港咁滯。聲言愛國嘅佢贊成將六四事件列入國民教育課程，建議老師授課時要講清楚當時歷史背景同事件前因後果喎。