拎住1萬蚊新台幣（大約2600蚊港紙）可以喺台灣買到啲乜？答案可能係一碗牛肉麪！花旗報紙《華爾街日報》介紹，全世界最貴嘅麪，係台灣「牛爸爸牛肉麪」！
呢碗麪（圖）得嗰4嚿牛肉同一條牛筋，憑咩收咁貴呢？答案好簡單，因為啲牛肉係好遠水路由日本、美國、澳洲同巴西運過嚟嘅！而為咗凸顯唔同國家嘅牛嘅特質，「牛爸爸牛肉麪」掌門人王聰源對每種牛都有唔同嘅切法，切完仲要慢火炆3日，夜晚就放入雪櫃唞一唞。佢又話自己啲麪好健康，唔會用太多調味料。不過，成萬蚊新台幣只係食得一碗牛肉麪，仲要連汽水都無，就算食完曉飛，華華都要諗諗先！