民間電台公民抗命逾五年，噚日再次被迫停播，原因係發射器廣播訊號太勁，被電訊局指影響咗航空通訊。
台長「阿牛」曾健成承認，有電訊管理局人員上門送通知，話喺今個月16、17同20號接到民航處投訴，指民間電台發射嘅廣播訊號，令民航局嘅通訊頻道受干擾。阿牛聽到後亦識做，因為民台只想挑戰佢哋覺得唔合理嘅《電訊條例》，唔係想影響航空安全。
料聖誕前搞掂
阿牛噚晚7點調校訊號後會再試播，叫電訊局如果發現仲有問題再通知，結果仍然話有干擾，阿牛惟有即時停播，話明會調校到唔干擾航空通訊先至復播，相信聖誕節前搞番掂。