常言道禍從口出，但如果講話嗰位仁兄係故意講錯嘢謀取利益，就作別論。國際米蘭教練賓尼迪斯前日捧世冠盃後嘅言論，一如所料已辣㷫班主莫拉堤，隨時食無情雞。有迹象顯示賓帥似乎博炒，如願嘅話等食呢餐聖誕火雞餐，哎，唔係，應該話係聖誕肥雞餐至啱，真和味！
傳48小時內失帥位
「我唔想回應佢（賓尼迪斯）講嘅嘢，家陣球迷好開心，呢番話唔應該喺呢個時候講。我家亦唔想提賓尼迪斯。」以上係莫拉堤喺賓尼迪斯講完「舊年摩連奴有8,000萬歐元（約8.2億港元）買5個球員，今年我就斗零都冇」嘅控訴後，所作出嘅回應。係人都聽得出莫拉堤唔多高興。英國傳媒甚至喺禮拜日傳出，賓帥個帥位會喺48小時內不保。
以賓尼迪斯縱橫球壇咁多年，淋盡西甲、英超、意甲冷雨，有乜可能估計唔到批評老細嘅後果？所以，好令人聯想賓帥係博炒。鬼咩，由佢今夏加盟3冠王國米，壓力千斤重，全世界人無時無刻將佢同摩連奴比較，真係人比人，比死人。仲有，佢上任後真係黑過墨斗，主將傷完一個又一個，聯賽又被死敵AC米蘭壓住，試問點會得到球迷歡心？
四面受敵抽身冇蝕底
咁仲未止，佢同球員之間嘅關係認真麻麻，好似前日捧完世冠盃後，唔係個個球員都開開心心，老將馬特拉斯拒絕參與頒獎禮，自己留喺更衣室宣示佢同賓帥唔妥，而史坦高域之前又公開批評賓帥唔識管理。老細、下屬同埋球迷都唔妥自己，換轉係你都識走位，咪就係趁早抽身囉！
消息指，當日賓帥離開利物浦時，得到大約350萬歐元「分手費」，而佢同國米之間仲有年半合約，若然莫拉堤要佢走，條數一樣唔講得笑。