英格蘭「萬人迷」碧咸嘅太太「辣妹」維多莉亞，一向都被外界視為惡妻，不過，河東獅都有溫柔時，喺星期日BBC體壇風雲人物頒獎禮上面，佢聽到碧咸獲得終身成就獎之後多謝自己，就忍唔住喊咗出嚟，喺嗰一剎那，比起平日惡形惡相嘅佢，真係平易近人好多。
由BBC主辦嘅體壇風雲人物選舉，喺星期日舉行頒獎禮，今年嘅體壇風雲人物，就由騎師麥蓋奪得，不過，大家嘅焦點就落在碧咸身上。由於大會之前已經放咗風話35歲嘅碧咸會攞終身成就獎，所以碧咸全家（包括媽媽珊德拉、太太同3個仔）都嚟捧場。碧咸喺台上領獎時，眼濕濕咁講：「我要多謝太太同3個仔，特別係我太太，佢唔單止幫我生咗3個可愛嘅囝囝，佢亦每日都啟發我。」嘩！聽到呢度，辣妹終於忍唔住，喊埋一份囉！
喺頒獎禮後，效力洛杉磯銀河嘅碧咸話仍然冇放棄再入選國家隊嘅希望，所以想獲歐洲球隊借用。
2010年BBC體壇風雲人物頒獎禮
獎項：體壇風雲人物
得獎人：麥蓋（騎師）
獎項：海倫羅倫遜獎
得獎人：威廉士爵士（賽車）
獎項：最佳年輕運動員
得獎人：戴利（跳水）
獎項：無名英雄
得獎人：希格夫（籃球）
獎項：最佳團隊
得獎人：歐洲萊德盃隊（高爾夫球）
獎項：海外最佳運動員
得獎人：拿度（網球）
獎項：最佳教練
得獎人：蒙哥馬利（高爾夫球）
獎項：終身成就獎
得獎人：碧咸（足球）