捷運新線煙火跨年夜　泡Lotion湯

月頭台北捷運蘆洲線又新開多5個車站，終點蘆洲站就在成蘆橋畔，一堆力sell樂活的雜誌即刻力捧「帶自行車搭地鐵」，一落車沿着五股濕地、觀音山等踩到剛獲「海岸環境風貌評選」選為「優質海岸」的八里。望見輕裝單車美女遊海岸的雜誌相係好靚，但台北家陣得9℃，或者我哋先來個溫泉──「熱」吓身先？

記者、攝影：陳慧敏
鳴謝：台灣觀光協會、中華航空

大唐金湯扮貴妃

八里這個溫泉最自豪是，擁有頂級黃金美人湯，因為是弱鹼性碳酸氫鈉泉（真係讀十次都未讀得順口），經日本中央溫泉研究所鑑定為天然溫泉，碳酸氫根離子含量又夠高，總之一句到尾就係浸完會勁白勁滑。艷姿跟美美應要求在水裏「扮捽身」，結果：「我們還以為是自己的潤膚露給泡出來了，周身滑潺潺的，現在摸起來又真係好滑喎。」溫泉分男女同浴同裸湯，怕羞者就訂個私家池嘆吓啦，但私伙裸湯規定，一定要兩個人先至俾入，你咪又心邪，雖則我認我第一個邪咗先，但規定是為怕有人在池內不適暈倒而無人知，想享受私伙之旅，就記得先要搵個伴啦！
個格局真係好似，十足十將日本個大江戶溫泉搬了過來，不過陳設變了「唐」式。有些又似番日本古街，中間突然見隻駱駝，商販賣的是日本和服，轉個彎又遇上印度文化節，小攤有印度香、首飾賣，仲有七彩沙龍同和服抗衡，穿着和服木屐食印度咖喱同烤餅。再亂啲？重頭戲12月31日跨年當晚還有大唐泡湯加跨年夜主廚自助餐，位位約$390，有liveband加跨年煙火大會，中台日印溝埋一氣，古古怪怪，呢啲咪叫做穿越囉！

■走廊上有「鎮店之寶」玉環魚同玉環夢露，點解要放喺度？因為佢個樣似老闆娘。

■另有食腳皮魚仔池，先鳴謝借出美味死皮腳的行家，還model們一個清白。

■浴衣質料算是較厚的一種，都幾靚。約$320起

■女仔最愛的環節，揀衫呀！但有些搶手品着唔着到睇你彩數。

■對面岸淡水老街賣$125的減肥木屐，這邊賣$200，都係嗰句，睇啱款就買啦。

套餐推介：

12月31日前有黃金美人湯加主廚養生套餐，瞓一晚包兩餐，二人同行洋式房間每房約$1,717，除開位位$859，假日就每房加多$250，不過，此套房每房有個私家溫泉池，個養生套餐散叫都要$165蚊喎！

a.八仙大唐溫泉物語　　
地址：八里鄉下罟村一鄰下罟子1-6號

又真係幾好食古早味

話明係大唐嘛，當年周圍小國如朝鮮等都有來進貢，真可謂乜都有得食，咁樂園餐廳當然都不例外。如白雪歌賣韓菜特別是石頭鍋飯，隴西行就賣咖喱同烤餅等印度餐，渭城曲有蘭州拉麪，清平調有小火鍋同麻油雞，不過去到台灣當然要食地道古早味麪線，就是最簡單的魯肉加隻蛋，還有早已出晒名的麻油雞，入味又煮到腍身的雞肉，咬下去麻油以後回贈你一點酒香，配上新竹最出名的爽口米粉，極受旅客歡迎好快賣晒！

■古早味麪線約$32

■麻油雞米粉套餐約$45

碼頭必搵雙胞胎

溫泉樂園裏有偽老街，而出門口乘車約十分鐘去到碼頭，尚有條八里老街真身。街上開檔幾十年的小食店依舊，而且紅的紅，不紅的就一直陪跑。

復刻版小玩意：

街上好多復古玩具店，80後都仍記得的辦館抽籤仔，你今日可以買夠幾盒返去篤夠抽夠佢，還有吹波波、口香糖、汽水糖等，不過始終都係復刻版，舊玩上的卡通人物都變了，愛懷古的老人家們望了兩眼就走。

■童年怨念之抽獎，買一包新年同老表們一口氣抽晒佢！

■古早圓牌，即是公仔紙？現在的小朋友玩過嗎？

人氣孖妹甜甜圈：

老街轉角處，有檔叫姊妹雙胞胎的老餅店，在海風颯颯的海邊，仍不斷有人排隊買炸包，特別是甜甜圈，拿住支管的阿姐一叉叉四五個塞埋一包賣，人人起碼買包五至十個。除了鮮奶油雙胞胎炸包外，當紅的還有甜甜圈、酸菜包、芋頭餅等，皮酥肉嫩不用說，琇玲說他們用林鳳營鮮奶做餡，特別鮮香；而芋頭餅除食到芋頭粒外，外層還用兩塊餅乾包住芋頭來炸，口感又複雜好多。問工讀生店員日賣幾多：「一日執到黑，餅不停咁出，我都唔知賣咗幾多個！」