聖誕節就到，唔單止市面上節日氣氛濃厚，港股也洋溢假日情緒，無論係南北韓軍演、美國經濟數據有改善、歐債危機喘定、內地加息機會略降等消息都無補於事，成交得600多億元，跌完又升番，完全自由行。
昨日上午當A股插逾80點時，大市雖跟隨下跌，但個股卻唔願跟；到下午大市跟A股反彈，個股又停滯不前，似乎在成交淡靜下，玩股不玩市的情況仍會繼續。
恒指昨日最低跌至22392，借勢將堆積在22400至22500的牛證變成肥牛鍋，大市跌至如此水平，士佳認為已經離底不遠，但並非即刻見底，跌多一千幾百點唔出奇，不過一千幾百點在未來日子並不算重大。至於買入方法昨日已提及，一係下跌時在低位分段吸，或者見反彈像樣再買，兩手準備，即使買唔中個底也不遠矣。
新盤將落成保障收入
對象方面，大家不妨留意家族式經營的老牌公司，如麗新發展（488）。麗展在麗新系中擔當本地地產發展的角色，收入主要來自物業投資收租及酒店餐飲業務，現時公司主要持有3項物業作收租用途，包括銅鑼灣廣場一及二期、長沙灣廣場及麗新商業中心。
近期收租股表現相對硬淨，加上通脹升溫，租金預期持續上升，麗展這幾項物業的價值縱然未算頂級，但相信亦會受惠磚頭升值的大浪，加上近幾年賣樓套現與減債，財政已大有改善，隨時會出現價值重估。
此外，麗展尚有幾個主要項目預計將於2011至2012年完成，如灣仔活道項目、大埔道項目、油塘項目等，未來收入有一定保障。士佳已持有此股一段時間，若然升穿0.28元便會考慮加注，但大市下跌憂慮未除，所以自己會趁低吸納，而非即時追買。
筆者及相關人士持有麗展
張士佳
寶來證券（香港）董事 投資服務部
mailto:[email protected]