特首曾蔭權上京見阿爺，唔喺香港，但好多港人都好掛住佢，佢老人家嘅人氣，噚日熱爆互聯網。係咁嘅，特首辦前日播出MCJin同煲呔合演嘅聖誕rap歌短片，係咁起錨、起錨，劣評如潮，兩日來點擊率過千，以煲呔嘅民望，算係有交代。
網民：浪費公帑
網民對呢首rap歌提出好多珍貴意見，YouTube網頁有人留言：「搞段咁嘅宣傳片為自己洗底貼金，又唔知浪費幾多香港人的公帑啦。」又有網民喺facebook嚴肅點評：「宗教角度去看，耶穌降世，為世人帶來希望，最後成全神的國度。但傳福音時佢又係咪大叫起錨、起錨？特首作為一個有宗教信仰的人，道理被如此歪曲仍照單全收，實在有愧。」
呢啲負面批評，煲呔唔會理你o架喇。有創意嘅網民就幫煲呔改編短片，一來幫佢挽回頹勢，二來為沉悶嘅上亞厘畢道綻放一點生氣。點擊率最高嘅改編作品係MC仁x煲呔嘅惡搞版短片，一日之內有過萬人次，係原裝正版嘅十倍。內容有些少粗鄙，八方唔方便引述，不過始終係真正嘅港人心聲，當然比河蟹宣傳受歡迎。