早兩日八方同大家講過，考評局請咗神童沈詩鈞嘅師傅、浸會大學教務長唐創時（圖）做新任秘書長，局方打鐵趁熱，噚日即刻安排唐教授同傳媒見吓面。雖然仲有四個月先返新工，唐教授已經賣晒口乖，話呢個Job係佢一直期望嘅工作，大讚考評局有Teamwork，為日後中學文憑試做好晒準備工夫，所以對新工作信心十足，可以完成歷史任務云云。
考評局近年成日俾學生批評，唔係出卷深就係鬧通識估你唔到。唐教授話，每個評核制度一定有高低分，最緊要係機制公平、公正。佢上任後亦有個新任務，就係幫考評局洗底，嚟個形象大翻新，希望家長同學生對考評局正面啲，仲話會增加考評工作嘅透明度。