南北韓局勢突然緊張起嚟，打斷咗港股反彈嘅勢頭，雖然北韓並未即時對南韓嘅軍演回應，但係投資者嘅情緒都係偏觀望，恒指最低跌落22392，不過尾段買盤積極，跌幅最終收窄至75點，收22639。
港股連續第2日下試100日線，企得穩兼再現錘頭，成交縮，維持開展反彈嘅條件，只要外圍市況靠穩，南北韓局勢冇新嘅不利發展，港股今日應該可以掉頭炒上，向23000關推進。
永利C輪24601：永利澳門（1128）噚日收報17.44元，升0.8%。永利股價繼續沿10日線推上，大戶下個目標應該喺20元，突破機會大過一半，可以諗吓隻C輪24601。
隻輪現價37.5仙，2011年3月8日到期，行使價14.327元，溢價2.7%，引伸波幅52.7%，槓桿率4.9倍（有效4倍），正股升上20元，24601睇61.3仙，升幅超過6成，如果正股跌返落16.40元就沽咗隻輪。
俊樺