除咗多謝伯樂同埋伯母，紀勤仲趁機為自己申寃！滙控（005）前主席葛霖棄商從政引發9月底高層大震動，而混亂同洩密程度，算得上係創滙控史上最差紀錄。當時更加有英國傳媒話，紀勤因為無得升做主席，所以威脅辭職。
紀勤對《每日電訊報》憶述呢件事時就話，佢同集團資深非執行董事（即係家個副主席）駱耀文，9月13日喺倫敦GoringHotel，出席被外界視為「鴻門夜宴」嘅飯局，佢堅稱席間無要脅劈炮，只係向負責遴選主席工作嘅駱耀文正式請辭。
紀勤又話，當7月底葛霖話畀佢知獲首相邀請加入政府，而滙控主席人選又必須留守倫敦，嗰陣佢已經知道「自己唔會做主席」，喺「鴻門夜宴」個晚，佢亦從駱耀文嗰度收到消息，董事會諗住叫范智廉做主席，佢當時仲回應話，呢個係好啱嘅決定，而歐智華係行政總裁嘅最佳人選。佢又強調，無悔喺獅子行做咗37年，亦覺與有榮焉。