港大李嘉誠醫學院趁明年係辛亥革命100周年，喺院內豎立一個高1.93米、重250公斤嘅孫中山銅像，銅像底部高40厘米嘅八角形底座，刻住忠、孝、仁、愛、信、義、和、平字樣，以紀念校友孫中山尊醫重學、救國救民嘅情操，噚日校方為銅像舉行揭幕儀式。
銅像係由孫中山孫女、孫逸仙和平教育基金會主席孫穗芳（圖）捐贈。佢同八方講，孫中山推翻中國皇朝世襲制度，以三民主義宣揚博愛和平精神，認為全中國都應該學習三民主義，有民主精神先係真正愛國之道。佢仲話，下月科技大學同埋公開大學都會擺放中山像，佢亦會將孫中山嘅和平思想，向北京當局申請成為聯合國教科文組織非物質文化遺產。