服務獅子行接近40載嘅集團行政總裁紀勤終於卸任！臨別秋波，紀勤接受英國《每日電訊報》訪問時就盡訴心中情，至緊要嗰part，梗係逐個恩人鳴謝啦！而芸芸伯樂之中，喺滙控（005）擁有「神級」地位嘅前大班浦偉士，對紀勤影響至深遠。
紀勤話，浦大班「毫無疑問，肯定係獅子行有史以嚟最出色嘅賓卡。」（thebestbankerthatHSBChaseverhad），佢好多謝浦大班嘅提攜。
形容大家都係硬漢
更重要係呢位伯樂，佢話浦大班性格同佢本人一樣，係硬漢一名（straightshotlikemyself），大家都係渾身是膽，唔理對住高官定係自己夥計，都係講得出做得到，絕對唔會講一套做一套！
查實紀勤都唔係第一個咁讚浦大班o架！好似滙豐銀行前行政總裁麥雅文，同埋梁高美懿（滙豐銀行前集團總經理，現任恒生銀行副董事長兼行政總裁）等等，個個都親口同華華講過，浦大班係賓卡中嘅賓卡；唔知他日獅子行啲後輩講起紀勤，又會點形容佢呢？
至於紀勤另一個要特別鳴謝嘅，就係佢嘅老媽子！紀勤話，若果當年唔係紀伯母睇到《愛爾蘭時報》（IrishTimes）一則招聘後生仔加入銀行界去中東開荒嘅廣告，叫佢去應徵，咁佢嘅人生可能就要改寫嘞！而喺加盟滙豐嘅一年，紀勤話輾轉穿梭巴林、阿布扎比、北也門同埋卡塔爾等國家，十年後亦因為工作關係，要密集式咁香港、新加坡兩邊飛，當然亦終於有幸同浦偉士遇上。
打賭一百萬 減肥20公斤
由呢個禮拜起，紀勤就正式退休，佢話終於可以熄咗部黑莓（Blackberry）手機，星期日可以去教堂，過番啲正常生活。未來大計方面，佢勁躊躇滿志咁話，全球好多唔同地方嘅人斟緊佢，但嚟緊嗰6個月，佢仲做住滙豐顧問先，趁機慢慢諗吓去向。
不過，有樣嘢就唔使慢慢諗，可以即刻做……近年身形暴脹嘅紀勤話，佢已下定決心要減20公斤，仲同香港一個商界朋友打賭一百萬蚊，出年11月要體重達標，跑紐約馬拉松喎！
李華華
mailto:[email protected]