英國今周末發生被譽為近25年最大風雪，多個主要機場關閉，陸路交通幾乎癱瘓，對我求大俠呢啲超級英國波球迷嚟講梗係失望，事關10場英超有7場取消，包括周日嘅車路士對曼聯嘅大戰；不過風雪當中都有人見歡顏，就係車路士領隊安察洛堤，同英冠葉士域治嘅領隊堅尼嘞！
最開心：堅尼/肥安
利物浦對史篤城取消，夜場焗住轉台睇英冠嘅葉士域治對李斯特城，球員就唔多識，不過兩軍領隊就好出名，老葉領隊係堅尼，李城領隊係艾歷臣。我睇住個電視一片白茫茫，仲以為壞咗，原來真係大雪成咁，老葉憑地利上半場已由諾里斯先開紀錄，史葛蘭特梅開二度，領先3:0；半場休息時，球場職員要用多15分鐘鏟雪，下半場先開得番，球證一度都想取消，但堅尼當然唔制嘞，老葉順利保持上半場勝果，終於喺英冠6連敗後贏番場，升返上17位，李城隊長安迪京治賽後就話：「呢場波根本唔應該繼續，我連身邊隊友都睇唔清。」不過堅尼當然好風騷，笑笑口講做領隊有時都要靠天時地利。
車曼戰取消，最開心就係車仔領隊肥安；事關呢排車仔沉到爆，5場英超不勝，曼聯剛擊敗阿仙奴，呢股氣勢肥安唔驚就假；肥安今次又爭取到額外休息時間，下周一先鬥阿仙奴，林柏特就有更多時間回復狀態。
最冇癮：費格遜、雲格
車曼戰取消，心雄嘅曼聯後衞里奧費迪南，即時喺Twitter發言，話破壞咗佢嘅美好周末，不過領隊費格遜就愁爆。連埋作客黑池，曼聯近排已經有兩場英超取消咗，下年2月又重開歐聯，補賽睇怕插晒入1月，紅魔隨時打到殘。蘇超嘅些路迪已經因為連番補賽，問南韓足總可唔可以延期徵召中場寄誠庸踢亞洲盃，費Sir又會唔會提出要求，希望朴智星可以留隊？阿仙奴（圖）對唔到史篤城，領隊雲格同樣愁，事關佢哋1月要踢多兩場英聯盃準決賽，賽程肯定密麻麻。
最神勇：哥頓
上周六踢得兩場英超，不過並唔係冇亮點；頭場新特蘭主場對保頓，「黑貓」門將哥頓（圖）完上半場前一次神奇撲救，化解對手禮特離門約3碼近射，連領隊布魯士都玩「食字」，賽後大讚呢位蘇格蘭門將，好似前英格蘭門神哥頓賓士咁神勇，球隊先保住1:0勝果。另一場布力般對韋斯咸就有慘劇，後備入替嘅布力般後衞菲爾鍾斯，上陣10分鐘，就同對方前鋒卡頓高爾發生碰撞，扭傷膝部，今季提早收「咧」。
最冇厘頭：黃金海岸聯
遠在澳洲，周日都有場澳職改期，就係黃金海岸聯（圖下）主場對中岸水手，場波踢咗19分鐘，比分仲係0:0就要腰斬，原因唔係落大雪而係落大雨。黃金聯今季一直入座率只得2千幾，今場原本想搞新噱頭，免費派21,000張飛招待球迷入場，但因天雨關係，實際入場人數只得一萬多啲，而且仲睇唔晒，唔通連個天都唔鍾意黃金聯？不過黃金聯冇氣餒，憑呢場票尾，買1月3日對光輝場波嘅飛，就可以獲5蚊澳元折扣。
