為咗吸引年輕人，老細呆rap聖誕歌，鬍鬚曾就繼續過去兩年嗰招，出漫畫宣傳預算案諮詢。今年以《擁抱明日，信有晴天》為題，一睇就知情節老土得來好「香港精神」，講到主角阿日仔求職遇到唔少挫折，加上家庭壓力，一度心灰意冷，但憑住對未來嘅信心，「確信只要努力就有機會創造奇迹」，終於度過難關等等。
鬍鬚曾話，佢睇到個漫畫封面時，聯想起過去幾年，大家努力從環球金融風暴掙扎，度過唔少風雨，最後雨過天青，終於可以相視而笑，想像未來喎。八方仲未睇本漫畫，但就好想知阿日仔個女朋友有冇要佢買樓先肯同佢一齊？佢最後有冇買到樓？買咗之後又有冇發現間樓發水發得好犀利？