阮兆祥同王祖藍、李思捷做《荃加福祿壽》而爆紅，除咗開演唱會之外，佢哋仲會拍埋電視劇，認真巴閉。原來，喺節目中扮到同盧覓雪成對孖生姊妹嘅祥仔，同好多女士們一樣，好鍾意食埋啲鹹鹹濕濕嘅零食，莫非祥仔扮女人扮上癮，連口味都同女人一樣？
齋睇相機
前日下晝6點幾，帶住副黑框眼鏡嘅祥仔，一支公去銅鑼灣行街，佢喺Swarovski睇完水晶之後，再去百老滙睇數碼相機，唔通祥仔想買聖誕禮物送畀女友Crystal？
祥仔攞起部Canon機仔之後試影咗幾張相，跟住笑晒口咁同個sales研究部相機。不過，最後佢都係放低部機冇幫襯就走人。離開百老滙之後，祥仔走到去渣甸街一間賣酸薑蕎頭嘅街邊檔，買咗一大樽蕎頭。祥仔畀錢嗰陣同賣嘢個阿姐好好傾，兩個人似乎相當熟絡。買完蕎頭，祥仔再去附近人和荳品廠買咗幾個粢飯，睇嚟都係買埋女友嗰份。
經常幫襯
馮仁昭後來去咗打探，先知祥仔原來係熟客仔，經常去買蕎頭，估唔到佢堂堂大男人都咁鍾意食呢啲鹹濕嘢。