八方原本以為，噚日《城市論壇》嘅焦點，梗係連日來頭條新聞嘅主角「維園阿哥」任亮憲。點知，《論壇》直播完冇耐，晏晝熱爆網絡嘅居然係「碧華依」，呢三粒字一度高踞Google香港熱門搜尋關鍵字榜首，力壓「任亮憲」，仲旋即成為高登女神，短短幾個鐘已有成11版討論。碧華依係香港土生土長嘅中、巴混血兒，噚日應邀擔任《論壇》客席主持，討論少數族裔政策。
得爸爸支持學好中文
好彩壇主謝志峰搵到英文名RaeesBaig嘅碧華依幫手，等大家可以聚焦返去少數族裔嘅教育就業問題。芳齡超過25歲但唔肯講實際幾多歲嘅碧華依，已經完成社工系博士課程，家任職一間社會服務機構，今次係第一次做主持，表現幾淡定。對於網民嘅支持，佢好謙虛咁話，覺得仲可以做好啲。
學中文係香港少數族裔面對嘅困難之一，民間一直要求政府放多啲資源去幫助佢哋。中學時讀九龍區名校嘅碧華依自言幾好彩，喺學校可以揀學法文或者中文，本身係巴基斯坦人嘅爸爸支持佢學好中文，加上媽咪係中國人，所以佢克服到學中文嘅困難。
不過，唔係個個都咁幸運，政府亦一直漠視呢個問題。融樂會總幹事王惠芬同八方講，教育局副局長陳維安暑假期間，去一間有唔少少數族裔學生就讀嘅中學演講，陳副局用英文向住班學生話，學中文係好難o架，佢細時都覺得中文難，好彩佢parents送佢去外國讀書咋。出席《論壇》嘅Fatima亦話，聽過陳副局喺另一論壇話，中國人學英文都難o架，叫佢哋努力啲。
陳維安冷待少數族裔
王惠芬覺得陳副局咁講不但九唔搭八，仲有凉薄之嫌，一來唔係個個家長有錢送仔女去外國讀書，二來淨係猛叫佢哋努力，但政府就唔肯正視吓佢哋喺家教育制度下嘅困難，好似講到係班少數族裔學生懶，先學唔好中文咁，好有問題。王惠芬仲形容，自從政府設立咗副局呢個位，好多民間嘅聲音都去唔到局長度，令佢有「止於至惡」之嘆。
mailto:[email protected]