香港天文學會會長楊光宇同八方講，佢準備向國際天文聯會一個專責委員會遞紙，將其中一粒由佢發現嘅小行星命名為「劉曉波星」。佢至今已經發現咗2,600幾粒小行星，5年來有44顆由佢親自提名命名。早排佢提名用內地藝術家艾未未個名命名一粒星，已經獲得接納。
委員會多數否決
楊光宇話，根據多年揣摩所得，「劉曉波星」申請成功嘅機會怕且低過申亞，因為據講冷戰時代美、蘇雙方係咁命名自己友，搞到星星命名變成軍備競賽咁，委員會怕麻煩決定一刀切，不明文咁規定唔接受政治同軍事人物提名。
呢個由16人組成嘅委員會，議事方式都好河蟹，唔係少數服從多數，而係以和為貴，只要其中一、兩個代表唔like，大家多數會唔批個申請。楊光宇早排試過入紙命名「昂山素姬星」，但委員會有人否決。
仲有，呢個委員會入面有中國代表，但就唔知佢係咪空凳支持者喇。不過，楊光宇講明今次係明知不可為而為之。楊光宇亦都送咗兩顆小行星嘅命名權畀中大，於是，宇宙家分別有粒「博文約禮星」同「沈祖堯星」。