仲有幾日聖誕又除夕，又諗住行街睇戲同唱K？悶唔悶呀！今年燈飾靚唔靚因人而異，但如果加埋個iPhoneApps，喺幅相入面落重料，效果即刻唔同晒！
記者：陳國輝
攝影：陳陶鈞
Model：Cupid@ZModel
白色聖誕 呼風喚雪
呢個App可模擬雪景，Preview仲有不停落雪動畫效果，包保每幅相影出嚟都唔同！玩法好簡單：開App，屏幕已滿天雪景，對好焦、㩒個快門掣就完成；跟住你仲可以即時Email俾老死，話佢知你現正身處瑞士，同緊女友滑雪，羨慕死人啫！
至冧留言 後加相框
打開介面，即時見到大量相框，例如聖誕節就有十款八款；揀好Effect，即拍儲存就搞掂，相片Size則為640×960。值得一讚係佢仲有花臣多多後期加工，除頭先嘅相框，仲可加入Cutie卡通Stamp，甚至手繪圖畫、寫字乜都得，創作空間極大。
刮刮卡 懶神秘
滿天雪景都未夠特別？想搵有創意嘅Apps，呢個肯定啱晒你！咪以為佢只係Key張相落個景咁簡單，實情當照片Send到對方部iPhone後，佢只係會見到一塊銀色貼紙，佢需要用手指刮乾淨，最後先見到內容部份，類似玩刮刮卡咁，勁有心思！而且，你亦可加插內心想表白嘅語句，再選擇唔同字款同顏色，等女仔自己拆開嚟睇，實冧死！
其他影相Apps
《360Panorama》
尖嘴碼頭燈飾，一幅相實影唔晒！呢款Apps特設360度全景模式，仲有格仔線俾你對位，咁咪唔怕斷開晒囉，仲包清包靚㖭！
《LetitSnow》
呢個程式有極強模擬雪景效果，每粒雪嘅形狀、體積，甚至風速都可以自己話事；更正係佢可以後期加字，表達你嘅深情話語！
