最近按揭證券公司牽頭，推出安老按揭。所謂安老按揭即係「逆按揭」，敏妮之前都喺專欄提過，年輕時供樓，到老時由層樓「供養」番你。將層已供滿嘅樓，按畀銀行，銀行每月將一定金額畀番按揭人，直至按揭人百年歸老，銀行就收番你層樓。其實，06年大陸亦都提出過「以房養老」的建議。
間房出租回報高
不過，聽新聞報道，香港啲老人家好似都唔係好接受呢個計劃，尤其係有仔女嘅，都想留番層樓畀下一代。始終香港一般家庭要買層樓唔係咁容易，辛苦咗大半世人，可能都係為咗供甩層樓，所以「樓」係重要嘅「不動產」，非必要都不會動。
再者，對於有下一代嘅老人家，有仔女供養，唔使靠按咗層樓。如果仔女冇能力，或者冇仔女嘅老人家，更加唔會貿貿然按咗自己層樓，中國人最重要係「有瓦遮頭」，有層樓喺手，個心就定啲。何況有樓喺手，就唔一定要靠按番畀銀行先有收入，必要時分租部份出去，又或者將自己層樓出租，自己另外搵層租金低啲嘅樓嚟住，都可以有收入。
睇返按揭公司公佈嘅計劃，參與計劃嘅長者，可以選擇10年、15年、20年或者終身等唔同嘅計劃年期。年期短嘅，每月就收到多啲錢，假設物業估值200萬元，選終身計劃，每個月收到4000蚊都唔夠。將自己層樓間做套房出租，收租回報應該唔只咁少，扣埋自己嘅租金開支，敏妮唔敢肯定係咪高得過「逆按揭」計劃每月收到嘅金額，但層樓始終都係屬於自己，所以相信香港推安老按揭唔係咁易。
溫敏妮
http://wanmanli.com/blogs/