上周天氣嚴寒，魏力對大市的感覺也是不寒而慄，之前兩日一口氣沽咗8隻股，意猶未盡，上周五想再減多兩隻，但望望組合，只剩港交所（388）、建設銀行（939）、德昌電機（179）、創維數碼（751），以及一隻用作對冲的熊證。沽邊隻好呢？
建行剛供完股，內地又暫不加息，負面因素消除不少，加上財政實力強勁，size又夠大，防守性應該不俗。OK，暫時擺多幾日，應該無大損失。德昌近期走勢差啲，但業績省鏡，如不跌穿5.30元，魏力仍會視為早前爆升後整固，加上有券商調整評級（re-rating）概念……都係唔沽住！創維又點？「家電下鄉」概念未炒完，近期走勢又好轉，潛力唔錯喎！
剩下港交所。此股走勢同恒指類似，同樣跌穿「頭肩頂」頸線支持，走勢向淡，加上港股交投縮減，不少新股又擱置上市，負面因素甚多。其實組合揸港交所已超過1個月，買入後炒上最高197.20元，諗住200元左右才沽，但卻事與願違。咁沽定唔沽？魏力宣判：本周反彈即沽！
魏力