佳節臨近，華華同班同事照例都收到禮節性嘅ChristmasHamper，有啲拆出嚟與同事分享，有啲捐去慈善團體，有啲就拎去其他部門。呢個不成文嘅規矩，相信好多行家都係咁做，但噚日華華聽到一個頗得意嘅做法，可能係前無古人。
話說有一個本地英文新聞網站，佢哋人事部門落命令，叫編採部同事將所有收到嘅Hamper上繳畀佢哋，佢哋就代表公司send番個thankyounote畀同事。
咁收集咗嘅Hamper做乜？原來佢哋諗住年尾搞party，將呢啲Hamper用嚟做抽獎禮物！咁前線同事點睇呢個order？初步反應咪話好似法國佬煮西餐─多舊魚囉！
呢班員工話，查實過時過節收乜嘢，都係大家一齊分享。至於話公司搞party搞抽獎，竟然唔係由公司科水買獎品，而係由員工sponsor，呢種咁寒酸嘅做法真係unbelievable。如果呢單嘢俾佢哋大大老闆知道唔知會點呢？
講開呢個網站，路邊社消息話，早兩個月有風水師傅上過去佢哋office行一轉，之後所有紅色嘅嘢都要拆走，唔知佢哋啲紅噹噹嘅卡片，稍後係咪全部換過晒啲顏色呢？