有謂「不在其位，不謀其事」，或者後面可加多句「不能再講」！「一離開個位就唔應該講o架，呢個係一個basicprinciple嚟嘅。」港交所（388）前CEO、現任數碼港管理公司主席周文耀，早前以新身份同傳媒見面，就係憑住呢一句，所有關於港交所嘅嘢，半句都無講到，功力之深厚令人敬服。
得一個公職邀請
唔講港交所，惟有講番數碼港。點解一個金融界CEO，退休先轉型做IT？「我不嬲出身IT嘅，我喺IBM出身，70年代做systemengineering，嗰陣仲係4Kmemory，做咗IBM幾年，我跳咗去新鴻基証券。」原來唔係外行人領導內行人去接呢個公職。「因為得一個（邀請）之嘛！」
不過，金融及教育界都好多公職喎！「都話得一個咋！咁我又唔係professor，唔可以做教育，又做唔到旅遊haha……（金融呢？）咁好似你係大學校長，退咗休，人哋有個新校長，你又返去話要管，唔得o架嘛！」
咁又唔係喎，任志剛都仲喺金融界別啦！佢強調自己去咗一個新階段。講開任志剛，周文耀話：「我同任志剛同屆畢業」「點解keep得咁好？」「平常心喇！」平常心呢三個字，冇乜白頭髮嘅周文耀，訪問當日一個下晝至少講咗10次。
身為香港第一代IT人，周文耀話，香港其實有好多IT人才都好成功，只係大家唔覺，「香港着重短期，但其實金融同地產都係長期嘅，只不過容易受每日股價、地價影響，其實冇一樣嘢係短期。」不過，今時今日嘅現實，仍然係你聽到個仔話入高盛，依然開心過聽佢話去搞研究。
講到推動香港發展ICT（InformationandCommunicationsTechnology），政府應該有好多責任，但由數碼港動土到家，香港似乎仲未成為亞洲leadingICThub！「人通常都係批評o架，你話無做嘢咩？肯定有做，但做得足唔足呢？各有各睇法，整體嚟講，係一代勝一代。」如果政府當年搞數碼21嗰陣，已經搵周文耀幫手，效果可能會好啲。