港股上周一再衝50日線阻力不遂，又再掉頭回落，且跌勢好急，由周初高位23490，短短5個交易日就大跌到最低的22519，跌咗970點，形態上更跌穿歷時兩個多月的頭肩頂頸線22783支持，上周五收22714，全周則下跌448點。
大市調整之勢未完，本月9日一文已指出，恒指11月底低位支持會再受考驗，唔排除會再創新低；年底前，大市仍會好波動，明年則可全面看好。到現時為止，看法並無改變。
理論上，跌穿頭肩頂頸線後會出現後抽反彈，之後就會大跌，而今次嘅形態量度跌幅目標係20577點。不過，凡事都有例外，主要係今次大市下跌，特別係跌穿重要支持位時，並未有出現大成交，顯示拋售壓力並非太大，除非有意料之外的不利消息衝擊，否則大市未必會跌到咁低。
早前講過，以一次正常的中期性調整看，大市跌幅通常在10%至15%之間，今次高位約25000點，恒指會下跌2500點至3750點，亦即落到22500同21250水平。
另外，若恒指調整前升幅的0.5倍，會下跌3000點，目標係22000點，跌幅約12%，已符合一次中期調整的要求，相信此水平會有較強支持。未來兩個星期，由於聖誕及新年假期關係，預期大市會在低位反覆，但卻係趁低收集質優或偏低落後股的機會。
勝獅貨櫃（716）近期表現強勢，基金亦不斷增持，富達國際於本月15日便增持609萬股，平均價約2.49元，持股量增至7.23%。另外，惠理基金上月亦增持385萬股，平均價2.334元，最新持股量5.07%。
業績改善將拉動股價
上月23日，本欄推介勝獅，當時股價2.17元，本月6日最高見2.60元，其後調整，近日升勢再起，上周五收2.48元，可繼續持有，目標價維持3.20元。
勝獅在月初已發出盈喜，指2010年會扭虧為盈，本欄估計盈利可達5000萬美元，每股盈利16.2港仙；2011年可再升至20港仙，有力拉動股價上升。
郭兆誠