北京有位溫影帝，香港都有個小生權。特首煲呔曾剩番嗰年幾任期，佢疑似對影藝界極有興趣，繼農曆新年惡搞麥兜合拍咗段《回家真好》動畫後，聖誕流流又獻新猷，搭上曾經講過唔知邊個係曾蔭權嘅MCJIN，整咗首Rap歌同市民賀聖誕。
揮舞雙手跟唔切beat
八方睇完個MV，睇見煲呔Fing手Fing腳擺出一副政壇chok樣，非常驚嚇。
呢首聖誕歌叫"RapNow2010"，失驚無神喪嗌香港市民起錨，話要同市民賀聖誕，但喺大部份歌詞都似喺度擦煲呔鞋，例如「我同特首估唔到咁有緣」、「好想要一條特首嘅BowTie」等等。煲呔冇rap埋一份，但喺MV度都有幾句對白，包括好鬼生硬咁講咗句「係？checkitout！」又不時跟住節拍揮舞雙手，但總係跟唔切個beat。
套MV上咗fb、YouTube後網民劣評如潮，直到噚晚9點半，有2,615人dislike、800人話鍾意。有網民話自從陳岳鵬入左特首辦之後，煲呔戲路闊咗；有人就覺得聽到起錨兩個字，就好似喺佳節被人問候屋企人一樣咁無奈。