天氣寒冷，聖誕節應該會更有氣氛呢！不過未加開快車前，先有「曼車決戰」。曼聯繼上周應付完阿仙奴之後，繼續硬仗連場，要作客對車路士。賽前費爵爺就揚言今場大戰希望可以終結作客史丹福橋的8年不勝宿命，上場勝仗已經要數到2002年4月，以3比0擊潰藍軍，認真大快人心。
上場紅魔雖然只能小勝兵工廠1:0，但就登上榜首位置，亦延續今季聯賽16場連續不敗紀錄，更以36個入球成為最強攻力球隊。里奧費迪南都提到上季對強隊成績未如理想，希望憑藉上場贏阿仙奴的氣勢乘勝追擊。之前都會擔心朗尼的問題會牽連球隊表現，即使火力有所削弱，但防守穩健是另一殺着，費爵爺都稱讚尼曼查維迪和里奧費迪南表現出色。紅魔在上半場多數守得住，16場聯賽當中只有兩場於上半場失過1球，不過到在下半場則失球較多，這個小毛病要特別注意。好消息是史高斯的腹股溝傷患已康復過來，應該今場可正選上陣，有老斯壓場助陣。
至於車路士近況就認真一般，近5場聯賽不勝，只錄得3和2負，好像已經忘記怎樣贏波了！現時藍軍在聯賽榜已滑落到第4位，並比曼聯少3分，所以今場全取3分就可同分，否則會被紅魔再拋離，到時想追都難。
文：依雯