潮車出招　攞彩扭花臣

要做潮人，當然不能墨守成規，變化多端才可凸顯個性！誓要成為潮人座駕Icon的Audi重頭潮車A1，亦以多變為賣點，變的不止外形，仲可以有埋級數，所以繼早前亮相的頂級Ambition版外，最近推出平足$40,000的Attraction版，大玩顏色，做潮人最緊要懂得配搭顏色，凸顯個性。

記者：趙慧敏　
攝影：王文忠

任你揀色轉色

雖然A1一直以自主創意為賣點，買家可自行配搭車身顏色，可惜早前只得紅撞銀的一款亮過相，又點可以配合潮人的多變特色呢！幸好代理陸續引入多款不同顏色配搭，呢款朱古力啡襯橙色，反而更啱我胃口，代理仲配上黃色火燄圖案拉花，令整體形象更添年輕活力，不得不承認車款形象確係靈活多變。

■軚盤改為膠料，多功能按鈕亦取消。

■擁有122匹馬力的動力裝置，表現不俗。

性能沒有降呢

這款Attraction版，直接啲講可以話係入門版本，不過動力配置與頂級Ambition相若，同樣屬1.4公升Turbo引擎，波箱亦是採用Audi的王牌七前速Stronic半自動波箱，所以無懼因此降呢而影響其性能及操作。至於最大分別，反而在細眉細眼之處，原來的真皮軚環換了膠料，無疑令手感稍遜，不過最大影響還是軚盤上的多功能按鍵亦取消，操控時稍覺不便，不過老實講，整個中控台佈局清晰簡單又就手，就算行車時要移動身邊按鈕，亦不會令人分心。
至於行車感上，兼備運動型風格及小型靈巧依然是其優勢，雖然少了跑車避震，輪圈又由原來的16吋合金輪圈改細一碼，換成15吋，令整體表現偏向路面型的小汽車風格，不過對一些斯文型或女潮人來說，操控時反而更覺得心應手。至於Attraction版擁有的Start/Stop系統，塞車、燈位停頓時可以暫時熄掉引擎，輕踏油門，引擎又可以重新啟動，進一步降低廢氣排放，據廠方數字顯示，A1平均油耗是5.3L/100km，以目前$14.8油價計算，每公里油費不足$0.8，絕對符合潮人講求環保的要求。