聖誕鐘，炒零售股，唔起眼但超抵買嘅，有寶光實業（084）。寶光主打眼鏡及鐘錶零售，兼透過知名連鎖店品牌「眼鏡88」及「時間廊」經營。單係2011年半年度（9月底止），寶光純利就急升咗9.9倍到5056萬銀。純利增長兼係業務帶動，冇水份，靚仔到爆。仲要咁睇，踏入下半年度，兼有多重節日，加埋零售暢旺，照計，寶光下半年度業績仲省鏡。係咁意計數，寶光2011年度純利上返1.2億銀，預期PE已經可以由家陣42倍，大降到8.7倍單位數。再講，落後超筍零售股，好似11月21號推介嘅先施錶行（444），股價短短一個月，最多追升咗1.5倍。呢轉主打嘅寶光亦一樣，唔起眼但超抵買，博資金埋身追落後，以寶光現價1.10元翻半番到1.65元計，目標價預期PE都係得13倍。
東方表行短打博20%
東方表行（398）2011年半年度（9月底止）純利倍升，上到7000萬銀，業績一樣靚爆鏡。同樣，下半年度有節日因素，業績應該仲靚仔。估計集團全年度純利1.7億銀，連11月配股攤薄效應計，預期PE得10倍左右，加埋集團ChinaPLay因素去睇，呢個PE水位，亦係好吸引。趁節日效應炒零售概念，短打東方表行，博20%到5.18元，目標價預期PE亦係得12倍水位。
錢雋