仲記得《冰河世紀》有幾抵死嘛？《壞蛋獎門人》由相同班底製作，不過主角唔係四腳爬行動物，改為一名犯罪大王！由壞人變好人，再變成絕世好爸嘅犀利哥，劇情爆笑之餘，Bonus更有得玩猜謎、教你砌火箭，一家大細睇住玩就至啱！
記者：陳國輝
Bonus學嘢玩遊戲
Bonus相當豐富！CG製作以及導演人員專訪梗唔少得；更值得一睇係三段由「迷你兵團」做主角嘅MiniMovie，加埋有成十幾分鐘！睇完短片，你更可玩猜謎遊戲兼砌火箭，啱晒細路仔。
醒哥聲演 溫柔惡爸
《壞》推出了Blu-ray及3DBlu-ray版，老實講，要有3D電視兼3D播放器先睇得到，唔係人人玩得起！但內容以笑料為主，呢個係事實，更因為有出爐視帝「醒哥」聲優演出，感覺更親切抵死！如果想聽DTS-HDMaster5.1高清音效，就只能以全程英語播放；若然你係「醒哥」粉絲，廣東話亦可照聽Surround5.1；試聲位有犀利哥潛入屈機大宅一幕，以及尾段空中追逐戰，各位可感受到子彈左穿右插嘅效果，或微細至機槍撞擊聲等。
特技誇張 潮語晒冷
睇CG電影，大家必然會留意畫質效果！《壞》都算落足心機，特別係幾位主角嘅服飾，例如犀利哥嘅毛冷、西裝褸、長褲以及三位小朋友嘅睡衣等，視覺質感完全唔同，甚至乎遊樂場內過山車嘅微細生銹痕迹，亦睇得一清二楚！不過，皮膚顏色以及武器等，相對地變得卡通化。
另一賣點，應該係玩港式用語。今次《壞》片唔講爛gag，反而玩轉經典電視廣告，例如明明一支縮細槍，將佢改叫「時倉迷你槍」；當迷你兵團食錯藥飛上天空，又突然加句「送你一對翼」嘅對白，係咪咁好笑就見仁見智，但設計對白方面可見用心。
Profile
畫面：1.85:1
音效：DTS-HDMaster5.1
價錢：$248（BD）$268（3DBD）$135（DVD）
