恒隆贊助中學生數學獎，出手闊綽，金獎得主有獎金二十五萬元，指導老師有五萬、學校得十萬，中學生唔高興到跳起至奇，更何況得獎後聲價十倍，申請入讀全世界任何一間大學數學系，定無問題，淨係頒獎人來自MIT、巴黎、臺大、劍橋等等，已係定心丸。
兩年一度嘅恒隆數學獎於十二月十三日在會展舉行，出席者有各本地大學數學系教授，有大學中學校長等等。左丁山以傳媒人身份出席，一路飲白酒一路發夢，如果自己還是中學生，得丘成桐等等數學大師選為金、銀、銅、優異獎得主，自世界著名數學教授手上領過獎狀，真係會興奮到三日三夜瞓唔着，視為一生榮耀。
恒隆兩兄弟陳啟宗、陳樂宗兩位都係能言善道之士，陳啟宗演講，大家聽得多，其英文演講之暢順，早有口碑，唔駛多講，呢日聽陳樂宗做總結致詞，嘩，原來又係好犀利，如果佢出嚟競選議員，以英文辯論嘅話，立法會唔知有邊個可以贏到佢。陳樂宗呢日借題發揮，諷刺名校（WherearetheKings,Queens,St.Pauls,DBSandDGS？）（按：十五間學校學生進入決選，沒有上述各校名字），講及DemocratizationofExcellence，指卓越成績並非傳統名校專利，而係各區比較平民嘅學校都可以得到。咁又係，呢十五隊決選隊伍之中，有兩隊來自迦密聖道，除一隊喇沙，一隊聖約瑟之外，其餘都係地區中學，攞銅獎嘅佛教善德英文中學，左丁山住得背，都係第一次聽見啫，攞金獎嘅係保良局百周年李兆忠紀念中學，銀獎得主就係喇沙。
但陳樂宗嘅主題好有意思，係呼籲本港學生以好奇心探索學問，花時間研究、探索一啲表面上睇起嚟毫無實用價值嘅意念，好似牛頓花大量時間研究舊約預言一樣，佢又話香港嘅大學商學院已有大把錢，開EMBA班就有財源，反之理學院數理化生一類純科學，就冇乜人支持，希望有銀士大力捐錢俾大學理學院，發展香港科學研究。商界人士好少講呢啲說話嘅，教育局局長孫明揚係港大數學系畢業生，最近要求英皇、皇仁等官中縮班，在台下應該聽到心領神會啦。