考評局噚日公佈成功撬到浸大教務長唐創時，明年4月過檔做該局新秘書長，年薪相信逾200萬元，堪稱教育界筍工。唐教授係數學專家，07年數學神童沈詩鈞入讀浸大，就係由佢為神童安排用五年時間讀完學士加碩士課程。
扭計骰訓練腦筋
唐教授小學時由香港移民英國，讀書好叻仔o架，大學時喺劍橋讀數學碩士同博士，上過霍金堂，又喺劍橋教過書。91年返港，第二年入浸大教數學，由講師升至助理教授、副教授、理學院副院長，最後做埋教務長。唐創時入考評局重要工作，係在2012年起推行新中學文憑試。佢係神童級教授，日後考評局出試卷，會唔會越來越深？
識得唐教授嘅人都知，佢係扭計骰達人，四分鐘就可以搞掂3格乘3格嘅扭計骰，辦公室有十副唔同格數同形狀嘅扭計骰，用嚟訓練腦筋，佢對仔女都俾佢教到玩得好叻。佢教書時用「數學模型」方式，三言兩言解釋唔到內容，重要嘅係佢話呢個模型可提升中六合彩同21點機會，如果佢肯開班公開授徒，一定好多人報名。
唐創時近年喺浸大都有啲風波，08年因宿生問題，與另外兩個社監，跟另一個社監林浡喺民主牆「互片」；舊年又寧願賠錢70萬怒炒助理教務長。