蒙嘉慧（YoYo）同鄭伊健雖然係公開嘅一對，但佢哋平時拍拖好低調，幾乎未試過正式一齊出現。噚晚YoYo同伊健各自出席活動搵銀，YoYo現身尖沙嘴出席美容店活動，講到佢同男友分頭搵銀，YoYo甜絲絲話：「咁啱啫，都係好事，證明大家都有嘢做。」
自爆有魚尾紋
記者問YoYo如果有人邀請佢同伊健情侶檔搵銀，佢肯唔肯？YoYo話：「我諗唔會，工作同私事都係分開好啲，不過如果係善事或者有可能。」
另外，YoYo近日俾人話個樣殘，佢話12歲開始戴隱形眼鏡，對眼拉扯得多，所以家都有唔少魚尾紋。問伊健會唔會介意？YoYo就話：「佢冇所謂，我對做facial又真係冇乜耐性。佢都係好懶，但係又keep得到，我都要請教吓佢。」
伊健之前透露有意結婚，YoYo話一直冇聽佢講過，所以有啲愕然，不過YoYo話：「其實我唔介意一紙婚書，開心咪OK，明年365日我都未ready結婚。」
伊健唔益女友
另邊廂，伊健又喺尖沙嘴出席朱古力活動，提到YoYo聽到結婚好愕然，伊健笑笑口話：「佢少睇報紙，我不時接受訪問都有講，不過我唔會成日同佢傾呢個話題。」
有傳YoYo同無綫已約滿，仲有意外闖，問伊健會唔會叫女友簽埋林珊珊做經理人？伊健笑住話：「唔會，我哋公司人手唔夠。」
