"亞洲兩「南」 一冷一熱"
沒有日聯日乙嘅日子，熱門客似乎活得更好；最重要係下午波少咗，刨起上嚟更專注，唔使亂石投林，未必係壞事。亞洲波水準唔高形勢亂更合博冷，要買熱門，周中爆冷輸畀大馬嘅越南今晚見真章啩，[-1]才有肉食；另一「南」，鬥志必堅嘅城南一和，踢世冠盃巴西國體會徒具質素，但鬥志一般，今季衰在早喺國內冇得爭，鬥志難以遠在阿聯酋可以似機器一撻即着番，季軍戰博[+1]。
"老細足球不應太冷待"
鐵血教練金判坤無聲無息地返南韓養病，希望佢早日康復。意識都唔受重用，梗係多多事幹，頭暈身㷫，無病呻吟，你睇吓兩位阿仙奴棄將，阿蒙尼亞又話操練受傷，今周又冇份；賓特拿呢？冇傷，但女友產子，免戰！嘩咁快，轉會窗就重開，坐坐吓冷板，都怕快走人咯。講番老細足球，我又冇睇得咁負面，o靚仔時，本地波好景老細多，個個要攞威，都唔覺香港足球有明天咁有遠見，要搞活青訓重用o靚仔；大家季季又唔係鬥擲銀彈，不斷車輪轉請嚟著名過氣國腳或者當打二三線鬼佬來港助陣，睇到我哋班波牛、井底之蛙眉飛色舞；我捧精工，你撐寶路華，重情義嘅撐東方、南華。只不過家香港足球一池死水，一人大把錢玩晒，你先覺得佢霸道。但試想，冇咗佢，香港足球會淪為乜嘢地步，仲有幾多人會提吓？所謂職業足球，業餘水平同管理加最低工資，何來理想可言，開番體院都吸唔到o靚仔入行。鳳凰未重生，也早熄火啦！
"務實黑池要冷拔熱刺"
半季未完，如曼聯後衞艾拉沙塵白霍，踩對手一文不值，被踩者唔使太介懷，聯賽係計贏波即攞3分，唔係計贏乜對手會有幾多分。今場踢得好，咪拍多幾吓手掌；踢得差，抵輸應該吸取教訓，切記固執賴地爛兼以為呢個世界欠了你，自己永冇做錯。做人低調未必等如冇料，黑池上次因大雪冇場練唔代表放軟手腳等你嚟劏，結果又爆冷作客贏史篤城；今次主場對大熱當起熱刺，黑池有理冇理，肯定喺自己個氹仔同你鬥攻，入球大、[+1]同冷W任君選。
"新特蘭車仔[-1]有冷味"
講信心，今周最想介紹新特蘭同車仔，分贏保頓同曼聯兩球以上，開[-1]。熱門當冷門賭，只因難度同值博率成正比，剛過去周中小注博冷又起勢中，唔通小弟真係寒命人？保頓上仗贏布力般有啲符碌，今次作客對攻力更強嘅新特蘭，睇吓中堅禮特會唔會出醜；至於曼聯上仗贏阿奴，對手發揮實在差，但車仔上戰唔能夠反勝熱刺，真係唔夠運，但見林伯同杜奧巴狀態番來，呢架車，仲唔反底？
"殺手太懶寧博拖肥糖"
泰維斯又話要走，好波、有場上及出售嘅價值，球會自會容忍，但呢班星級波高薪兵各有想法，我真係唔欣賞，唔齊心都攞到聯賽冠軍？賠率太懸殊，我周一場寧博作客佢哋嘅愛華頓，冇理由咁差，主場唔買，作客壓力反減可冷博和。
語錄：熱門當冷門賭，只因可用較冒進方式，玩[-1]豪啲，咪細注啲咯！
蘋果波神