退休後很極力監督政府嘅陳太，噚日大讚政府推出打擊樓市措施有效，因為佢第一身體驗財爺辣招。陳太噚日透露，早排打算買多個單位收租，長線投資應該保值過放喺銀行，點知額外印花稅（SSD）、收緊按揭措施一出，賣家即時冇晒聲氣，相信係因為賣家諗住趁市旺換樓，但做按揭有阻滯，又想睇定啲市況，所以按兵不動。
為官時同現任公務員事務局局長俞宗怡同屬「手袋黨」成員嘅陳四萬，噚日稱喺立法會公開點名批評俞局長嘅調查梁展文報告同日，與俞局長食咗餐飯，席間有安慰同開解吓呢位姊妹，「你諗吓佢心情會唔會好？梗係唔會好啦」。
陳太過去有被立法會調查報告點名批評經驗，佢話當時除咗自我檢討，另一個令自己暫時唔太煩惱嘅秘訣，「就係唔好睇報紙」。陳太噚日多番力撐俞宗怡做公務員幾十年間，盡心盡力、好有承擔，今次犯錯罪不致死。