葉劉淑儀宣佈成立新民黨，還招攬了田二少田北辰加入擔任副主席，大有在政圈大展拳腳之勢。不過葉劉對坊間傳言她是盛傳角逐下屆特首人選、行政會議召集人梁振英的「班底」一分子，反應奇大，更與梁召集人劃清界線，揚言「朋友都講唔上」、「大家根本唔熟」。有政圈中人對葉劉大反應不覺意外，事關近日有傳言，梁召集人出戰下屆特首機會麻麻，阿爺未必肯讓他「入閘」出賽。
高攀唔起朋友都講唔上
葉劉昨日與田二少以新民黨正、副主席身份見記者，席間兩人互送高帽，葉劉大讚田二少勤力，指不時凌晨時分都會收到對方電郵，「仲勤力過田北俊、勤力過特首」，田二少則不時大讚「葉太講得好啱」回禮。葉劉表明組織新民黨旨在吸納過去未有投票的選民，她說，匯賢智庫在薄扶林區議會補選一役慘敗公民黨手下，令她明白日後參選必須有旗幟鮮明的政黨，「所以有網民叫我哋做新公民黨」。
田二少說，不怕自由黨派人參選搶票，強調參選最重要是「靠自己」，又指即使劉健儀肯堅守協定，她旗下人手會否真心付諸實行亦成疑，「因為呢個世界啲人好複雜，佢（劉健儀）咁講最多都係買個安心，但有時啲安心可以好危險」。
葉劉既然要在政圈有一番作為，單仁自然問她組黨時有否和CY交流意見時，事關年初已盛傳她是CY競選下屆特首的班底，對此葉劉反應罕有地激動，即場與CY劃清界線：「我飯都冇同佢食過，朋友都講唔上！我高攀唔起佢，大家根本唔熟！」
傳阿爺想只派一人出選
有政圈中人對葉劉反應並不覺得意外，事關近日CY較之前低調，政圈開始又有人傳言，指阿爺認為若泛民下屆再派人選特首，建制陣營最好只有一人出選，若建制派有多於一人，恐怕會增加政治風險，若傳言屬實，梁召集人可以成功「入閘」出戰下屆特首的機會，自然大打折扣，葉劉新民黨正值招兵買馬之時，又怎會想和CY拉上不必要關係？