年尾gathering飯局特別多，前幾日跟股壇前輩同佢個基金經理朋友食飯，敏妮當然唔放過機會，問基金經理明年投資主題，佢就睇中隻內需股。又係內需？「我哋只係專搵啲高息股嚟投資。」基金經理說。
今年黃金大升，基金經理話自己都有揸黃金ETF，明年繼續睇好黃金，仲問敏妮有冇買。敏妮記得股壇前輩講過，雖然黃金冇息收，但portfolio裏面點都應該有啲看吓門口。經過金融海嘯，敏妮深深體會前輩嘅經驗之談，好彩敏妮都有買紙黃金。
投資組合要有黃金
講開黃金，敏妮諗起手帕交公關C。佢同敏妮都經常自嘲係「剩女」、「敗犬」，始終「自嘲」好過俾人「狂踩」。雖然大家都係「剩女」，但公關C就肯定係「黃金剩女」！
公關C喺公關界都有好一段日子，一向以做嘢夠「博」見稱，佢嘅目的都係想盡快搵嚿錢，當有一日突然唔想再「博」嘅時候，「hea」住做都應該可以夠過生活。
拼搏係為過得更好，當然平日佢都好對得住自己，大時大節同家人過，情人節呢啲溫馨日子，佢都會吓自己。
聽佢講，入行無耐，佢就開始每年喺情人節送個金幣俾自己，大細就視乎當年自己嘅「業績」，如果之前一年花紅分得多，就重手啲，當係獎勵自己。入行十幾年，家陣都儲埋十幾個金牌，每次見到呢啲金牌，都好有滿足感，除咗見證咁多年做嘢嘅生涯，睇到家陣金價不斷升，更加滿足。
但敏妮曾經問過佢，「吓，乜你當年已經覺得自己係『剩女』，要送情人節禮物俾自己？」作為專業公關，佢嘅答案相當專業──不願置評！
溫敏妮
http://wanmanli.com/blogs/