崔建邦近年是非纏身，牽涉打前女友鄺慧敏（中巴），跟住又嚟多單醉駕，搞到要停牌9個月同罰款6000蚊。雖然形象插水但佢都唔使愁，事關話佢已經冧掂志雲會返無綫復工，佢連外快都keep住有得搵。噚日佢幫「SheCritiques美容大賞2010」頒獎典禮做司儀，不過佢做完嘢就即刻離場避訪問。
周秀娜威脅男友
同場仲有着透視裙露腿嘅周秀娜，兼低胸露事業線嘅劉心悠，雖然噚日得幾度，但佢哋着到好似夏天咁消暑，咁性感少不免被人比較，心悠風騷咁話：「人生總有贏有輸。」明顯覺得冇輸到畀娜姐。至於娜姐之前同男友感情亮紅燈，佢話已經轉番綠燈，不過佢聖誕要去台灣拍戲，如果到時男友唔嚟探班，就會即刻轉番紅燈喎！
另外，鄺慧敏噚日就喺紅磡出席BANDAI活動，講到崔建邦醉駕停牌，中巴話判嗰日已經知道，仲話：「希望佢以後小心啲，唔好再發生呢啲事，點都要為其他人着想！」至於崔建邦仍然封嘴唔提佢，中巴就話每個人嘅處理方式唔同：「我希望佢開心幸福啦，過咗咁耐，自己已經冇嘢，同埋我都有新戀情，男朋友叫Evan，佢係生意人。」
