短線遊，通常都係食、買多過玩，但打工仔假期苦短，出外短線遊樂都係想攤吓唞吓，由頭hea到落尾。咁屬於三小時生活圈距離的台山，入住浪漫小屋別墅、浸吓溫泉做吓spa放埋煙花，夠晒滿足！
記者：悠樂長
攝影：星辰大師
Model：CcCho@PlaygroundEntertainment
鳴謝:新華旅遊、台山康橋溫泉度假村
108個溫泉浸爛Bikini
在廣東台山曾有一個傳聞，當地一條村有個天然熱水池，由於水溫非常高，不少村民時常到池邊烚雞去毛，自此就被外間發現該區蘊藏着豐富的天然溫泉水。雖然這只是傳聞，但在台山市白沙鎮一帶，溫泉酒店的確開到成行成市，好似今次到訪的康橋溫泉度假村仲越開越大，公共溫泉水池數量足足有108個，主要分四大主題，峇里島風情區、歐陸悠閒區、養生區和浪漫情侶區。
進入溫泉區，一開始只見幾座小石山，以及老遠的滑梯，再行一小段路就陸續見到各式各樣的溫泉池，重點推介其中的中藥溫泉和花香溫泉，薰衣草、紫羅蘭、何首烏、仙芝泉等，這些材料用一些好像湯包的布袋包好，放在泉邊，浸落去感覺好像自己置身湯煲之中。親身的感受認為，憑嗅覺和觸覺都不會分得出各種材料的分別，不過溫泉水的溫度就明顯不同，有些泉水設定在較貼近人體溫度的攝氏三十多度，有助釋放身體的壓力，亦有些設定至攝氏四五十度，有助舒緩疲勞。要試勻108個池，真係要準備多幾套bikini，浸爛一套換一套。
魚療越大條越痕
除了溫泉，區內還有礦沙浴、熱石床和按摩。礦沙浴有乾瞓和濕瞓兩種，無論乾或濕，當中的熱力都有助血液循環。還有最啱女生的土耳其魚療，利用小魚來吃掉腳上的死皮。最抵死的是場內共有三個魚療池，分小魚、中魚和大魚，不過大家放心，「大魚」都只不過是約兩隻手指大小而已，不是大鯇魚！不過魚越大條就越痕，怕癢的朋友最好都係去細魚池好啲。
此外，偌大度假村當然少不了水上樂園，冲甩泳衣大水桶、企唔穩人造浪、氹氹轉浮泡激流，還有兩條兩三層樓高的滑梯，不過速度不算快，男女老幼都啱玩。
康橋溫泉度假村溫泉區
費用：成人約$113（周一至五）、約$125（周六日及公眾假期）
兩Pair情侶包一屋
地方大真係想點樣發展都得，康橋溫泉度假村以往都只提供酒店式房間服務。不過今年初開始，度假村新建了16套獨立式木屋別墅，小木屋是和式設計，每間屋有一個大廳、兩間睡房連廁所，感覺悠閒優雅，啱晒情侶來度假sweet。不過，房價$1,485只包一間房，所以最好係約埋另一對好朋友一齊入住，就可完完全全地擁有私人小天地，點玩都得！最值得欣賞的是，由睡房通往室外的庭園，旁邊還有一個小小的溫泉池，只需約十分鐘就可將水池放滿泉水，如此私密的空間，最啱情侶一起泡溫泉，晚間更可以望星星……咁嘆的情景如果即時上載到facebook，一定讓朋友們like爆兼洗版。
五味走地鵝肉滑滑
除了廣東省一帶享負盛名的泥煨雞之外，台山還有甚麼特產？度假村經理說：「台山最有特色的，是五味鵝和潮境蘿蔔。」度假村中菜餐館鳴泉居便引入了這兩道台山傳統菜，更是店內招牌菜式。鳴泉居以五邑風味見稱，大部份食材都可在台山自給自足，特別係潮境蘿蔔，是菜館首要推介。潮境蘿蔔雖是簡簡單單的蘿蔔配上湯，但用的是本土蘿蔔，味道清甜而少渣，口感清新。經理更透露曾有香港旅客，就在餐廳內購買500斤台山蘿蔔返港，自己煮潮境蘿蔔。食材質料好，菜便不會差。五味鵝用上當地的走地鵝，地方大運動量夠，只要簡單將鵝肉放上醬汁燜熟就得，鵝肉入口夠晒滑。
90後Cc私放煙花
在內地，私人燃放煙花爆竹限制不多，一場來到點都要舉行「蘋果活樂遊聖誕煙花預演」。一般度假村很少會容許住客在園內放煙花，不過在這裏，度假村早已劃出放煙花區域，而且園內更有煙花爆竹擺賣，由小型的「滴滴金」以至大型的「龍吐珠」、巨型煙花等十多款選擇，最貴都是百多元、可以連續發射二十多炮的巨型煙花。對於90後的模特兒Cc來說，私影就去得多，親手私放煙花就真係好新奇。
a.台山康橋溫泉度假村
地址：廣東省台山市白沙鎮朗南村
網址： http://www.dreamland-resort.com.cn
台山人推介：中山最長甜品店
台山美食的位置較分散，問食甜品補品哪裏最好，當地人的推介反而是鄰居的中山市，因為中山舊城區，整條街都遍佈甜品店。領隊哥哥的推介店特色係「長」，招牌店名是「中山市石岐區民信老舖馳名雙皮奶薑撞奶」，足足18個字！呢度有五六十種甜品，款式大致上香港都有，但當然價錢平好多啦。當中以奶類甜品做主打，推介炸鮮奶和薑汁撞奶。炸鮮奶奶味強烈，外皮炸得剛好脆口；而薑汁撞奶……如果以「奶撞薑汁」來形容，大家或會想像到薑汁的味道如何強勁，愛薑味者要一試。
b.民信老鋪
地址：中山市南基路47號
TravelMemo
持有效回鄉證或卡均可。中國旅行社：28533533
新華旅遊台山康橋溫泉度假村2天純玩美食團，每人由$379起（住宿湖畔別墅），每人由$539起（住宿小木屋別墅）。查詢： http://www.sunflower.com.hk
1元人民幣約兌1.16港元（文中價錢已折算港元）
220V，兩扁腳插座
台山
明日天晴，5-18℃
