留醫治癌嘅華叔早前話想返鄉下睇睇家鄉現況，支聯會即時派人火速北上華叔故鄉開平，拍下最新片段供華叔紓解思鄉之情。一行三人攝製隊上星期三出發，即日來回，初步剪輯成半小時片段，前日送到醫院畀華叔同佢兩個妹妹一齊觀看。據支聯會秘書何俊仁稱，華叔睇到鄉下短片好開心，指指點點舊日足迹，當年喺邊度游水、冲凉記憶猶新，同妹妹一齊遊玩過嘅鄉土，亦歷歷在目。
祖屋被夷為平地
華叔係開平赤坎鎮人，阿爺有間屋喺當地東華里，攝製隊成員之一吳永輝話，佢哋抵埗後即時搵華叔祖屋。據鄉親講，華叔祖屋在解放後被夷為平地，磚石木材用來修橋補路，家陣只剩低地基痕迹，塊地雜草叢生，長咗幾棵樹出嚟，十分荒蕪。吳永輝用iPhone定位間屋經緯度，紀錄呢個重要地方位置。
東華里外有個大魚塘，華叔至今仍然記得呢個大魚塘，因此睇到短片影到個魚塘，即時話以前曾在魚塘游水，回想暢游在家鄉水中嘅時光，表現雀躍。華叔喺香港出世，抗戰時返鄉下避難，除祖屋外，亦喺附近東滘龍住過，攝製隊坐車去東滘龍追尋華叔足印。
雖然事隔幾十年，華叔仍然記得東滘龍景物，竟然認出短片入面一間屋，當年曾經住過，間屋現時似已荒廢，應該無人居住。
華叔闊別家鄉多年，表面上係大陸禁止佢北上，實際上中共不時搵機會統戰佢，位於赤坎鎮嘅司徒氏圖書館，據講不止一次邀請華叔返去參觀，但華叔唔想成為中共政治花瓶，始終不為所動。吳永輝同八方講，拍攝期間圖書館負責人都有同佢哋介紹圖書館狀況，又話好歡迎華叔回鄉。有鄉歸不得，望鄉不能回，相信係中國人先至有嘅哀愁。
睇家鄉短片之餘，華叔近日精神唔錯，日前睇電視直播諾貝爾和平獎頒獎禮時，心情幾激動。何俊仁指華叔可以落床飲早茶。民主黨一班立法會議員噚日亦去探病，張文光話華叔情況穩定，可以踩單車機練腳力，又話三個司長都曾探望華叔。
mailto:[email protected]
