大戶嘅世界，邊個錢多邊個玩晒，要炒上炒落總有大把藉口。歐洲火頭處處，國債危機陰魂不散，就算自己國家好掂如德國、法國及英國，國內金融機構對歐豬國貸款規模分別超過五千、四千及三千億美元，炒家可以利用歐豬五國輪流發功，評級機構繼續做幫兇又或者反過來被炒家利用。點解內地A股跌些少，H股指數可以跌超過2%？何解亞太區股市唔使點跌，香港會跌成500點？唔通亞太區只有香港一個市場同歐洲關係密切？對歐盟出口佔國家GDP比重超過兩成嘅新加坡，都只係跌0.94%咋！
近期大行紛紛發功話港股抵買，以14.5倍PE點計都唔貴，怪就怪過去幾年會計制度同稅制扭曲港股PE，地產股要將投資物業公允值變動放入損益表，呢幾年資產價格水漲船高，盈利多少會有水份，仲有去年內銀利得稅由33%降至25%後，再有4萬億元人民幣刺激經濟，一切都係由一次過效應得來，實質PE究竟有幾高，天曉得！
要震散港股，關鍵係成交要夠薄，趁假期氣氛濃厚投資者無心戀戰，更有利放大低成交挾倉或震倉嘅殺傷力。
大行轉軚唱淡有因
既然市場唔理性，亞太區只有香港先玩點穴後玩儍跌，以為睇住內地A股做頭跌得唔多香港就唔使跌，一向都係大錯特錯，好嘅時候就當然應驗高盛嗰句香港點只有中國概念咁簡單，衰嗰陣就只怪香港係開放型經濟體。投資者見呢兩日開始有大行出嚟轉軚唱淡港股，只係等於話俾大家知佢哋已經勝利大逃亡，甚至打咗反手球。
信今年年底恒指目標水平嘅投資者留意，向來最拿手吹奏魔笛嘅大摩，上周繼續好保守咁算到港股年底目標見26193，希望呢家大行唔好忽然離年底不足兩個星期至轉軚甚至玩HandbrakeTurn，當然，衷心希望明星分析員睇年底見27500會開口中，換言之恒指有近兩成升幅，唔該有份睇年底26000目標而未轉軚嘅一眾大行同心協力出嚟幫個市托一托，發揮合唱團嘅團隊精神。
胡孟青
作者為獨立股評人