每逢年尾，市場總會憧憬基金粉飾櫥窗，做靚盤數向客戶邀功。魏力以前曾任繙譯員，譯過唔少基金文件，發現「芬佬」到咗年尾，假日情緒往往比一般散戶更強烈！何況恒指昨收22975點，年初以來只升5%，基金如以恒指作比較指標，要跑贏大市可謂易如反掌。既然如此，基金又何需再努力掃貨呢？近日交投淡靜，正可反映這情況。
昨午穆迪將西班牙主權評級列入負面觀察，累港股一度急插逾500點。基金認為前景唔明朗，手上股份反正有賺，借勢沽貨計數，明年再戰，亦可算是「粉飾櫥窗」！組合昨早亦採取相同策略，魏力分別沽出微創（853）、西部水泥（2233）及春天百貨（331），合共套現243820元，但亦趁午市大跌時，跟「港股王」名家沈振盈買1萬股建設銀行（939），每股6.97元。
大摩及花旗昨分別發表報告唱好內銀股，兩行同樣看好財務穩健的建行，目標價分別為8.75及8.80元。
魏力
本月逢周二、四、五刊出