到開平赤坎拍攝華叔家鄉嘅攝製隊上星期三出發，喺皇崗坐車到赤坎，做GPS地圖生意嘅吳永輝話，去赤坎唔難，去到鎮上搵華叔祖屋卻頭，因為華叔幾十年冇返過鄉下，對家鄉現時乜環境零認識，所以攝製隊費咗唔少工夫先搵到間祖屋原址。
隨意拍有意外收穫
佢話東華里現時幾破落，當地都唔係好多人識路。問路後搵到東華里外面個大魚塘，先知道原來當地人叫嗰處做塘邊，去到塘邊就容易搵到東華里，終於完成使命。至於拍攝到東滘龍華叔曾居住間屋，可以話係運氣，因為佢哋只知華叔曾暫居東滘龍，搭車去只係打算隨意拍啲街景鄉土情況，點知華叔睇片時好眼利，一眼認出住過間屋，導演張大衞同八方講：「我拍嗰時完全唔知間屋係華叔舊居，見到華叔咁高興，真係好難得。」張大衞話拍攝咗好多片段，日前匆匆剪輯半小時精華畀華叔先睹為快，正趕緊做後期配樂同旁白，製成精裝版本畀華叔珍藏。