玩開《無雙》系列，睇慣晒起角嘅3D機體，嫌太假？新返《高達無雙3》可能大家啱玩！今集風格大改，以往多賣弄CG技術，今回突變經典Cel-Shading風格，感覺似睇緊原著動漫，好有親切感；新追加吹雞系統，搵埋隊友幫拖劈友兼補給能源，勁真實，唔講以為睇緊卡通！
記者：陳國輝
刀刀有劍氣
今集再追加新機體？預咗啦！除延續舊作Z高達、W、TurnA、SEEDDESTINY以及F91等之外，呢次仲有00、UC、0083同埋X參戰，總數多達13部作品，非常熱鬧！但最令人意外嘅，係佢竟然飛起慣用3D畫風，改為起用Cel-Shading！究竟呢樣嘢係乜東東？簡單講，遊戲進行畫面感覺似睇原著動漫，尤其飛撞敵人、拎起大刀怒劈，甚至乎戰場環境氣氛等，都極之動畫化，連高達舉劍Pose都睇到有藍光劍氣，贏晒冷冰冰嘅3D機體啦！
自製個人高達
成日玩翻出嘅機體，覺唔覺得悶先？嚟到第三集，終於加入自製高達新玩法。簡單講，只要你殺敵眾多，就會獲得金錢，然後構建一個屬於自己嘅Gundam王國。當中可作調整嘅數值，包括戰鬥力、防守、射術以及移動速度等，舉個例，如果你鍾意主動攻擊，就梗係投資喺戰鬥力同埋射術方面，至於打慣游擊嘅話，建議你都係集中火力喺防守以及逃跑技巧。值得一提係，你可以執人二攤，儲埋敵人啲武器，以其人之道還治其人之身，型！
誘爆系統一鑊熟
今集仲追加咗俗稱「吹雞」嘅小玩意，當你攻佔敵人的哨站，又或者儲齊指定物件後，你就可以Call齊人馬，幫拖打大佬。例如合力殲滅敵方陣營，或為你作掩護，甚至助你補給能源等，由於可供連線玩家參與，令變數更多。此外，當能源值達到指定要求，你更可使出一招必殺嘅誘爆系統，即係當某機體發生爆炸嗰陣，從而令到附近嘅機體也同時遭殃，呢一招可謂慳水慳力，似隔山打牛咁爽！
Profile
平台：PS3/XB360
類型：動作
玩家：4人連線
發行：NAMCOBANDAI
