王喜為力谷無綫劇《囧探查過界》不惜自製與鍾嘉欣的緋聞，但仍敵不過林峯和鍾嘉欣官方螢幕情侶的根深柢固，昨日他戲言要與鍾嘉欣拆夥，更語帶雙關指無綫力捧藝人招數「不遺餘力、無孔不入、水銀瀉地捧佢哋想捧嘅人。」隨着昔日迷雲黨翻身，王喜坦言想與崔建邦合作「試吓work唔work。」
無綫劇集《囧探查過界》昨日在尖沙嘴宣傳，王喜、鍾嘉欣、黃浩然和朱慧敏等均有出席。早前王喜笑言要與鍾嘉欣組聖誕情侶檔，昨日卻宣佈拆夥，他笑說：「我哋呢對螢幕情侶，組合咗兩星期都冇人搵、又冇人寫、又冇人跟，所以我宣佈拆夥炒佢魷魚，可能我哋係非官方螢幕情侶。」
寸捧林峯無孔不入
記者笑指王喜比不上林峯和嘉欣的情侶檔根深柢固，王喜語帶雙關說：「證明TVB捧人不遺餘力，善用資源，多角度、多層次、無孔不入、水銀瀉地捧佢哋想捧嘅人。」查實連王喜的《囧》劇也不斷玩林峯。
問王喜有指陳志雲幫崔建邦翻身做《勁歌》優秀選和總選主持，王喜最初表示是監製有需要，有指當日崔建邦對陳志雲表現反骨，王喜隨即扯開話題說：「唔講陳生，跳過下一個問題，鍾嘉欣真係靚。」接着他再被追問當日有指崔建邦是叛徒兼對朋友不好，王喜說：「傳聞嚟啫，唔好話係咪叛徒，都係TVB一分子，既然我同鍾嘉欣做拍檔唔work，不如試吓同崔建邦work唔work。」
鍾嘉欣趕劇損失大
問王喜會否叮囑要對朋友好？他說：「我會先叮囑自己要再好啲，對大家要更加好，我同你哋（指記者）情同姊妹。」是否包括崔建邦在內？王喜說：「係拍檔，但我哋私下唔係好熟，只係見過幾次面。」劇中飾演女鬼的鍾嘉欣勁冧林峯，她笑說：「劇情需要啫，不過佢咁紅，當佢係偶像咁做都啱。」她透露為趕拍兩套劇，損失不少搵錢機會，令她肉痛。
採訪、攝影：何慧斯